Rheilffordd y Trallwng a Llanfair Caereinion

Stêm sy’n tynnu y rhan fwyaf o’r trenau, un ai gan un o’r locomotifau gwreiddiol neu un o dramor. Hefyd, mae’r cerbydau’n arbennig; daw’r rheini a ddefnyddir yn rheolaidd o wledydd Hwngari ac Awstria gyda mynediad at y seddi caeedig drwy falconi agored - ffordd hyfryd o wylio’r byd yn mynd heibio.

Mae’r rheilffordd yn rhedeg rhwng y Trallwng a Llanfair Caereinion. Mae’r daith 8 milltir i Lanfair Caereinion yn cymryd 45 munud felly does neb ar ruthr! Dyma’r ffordd yr oedd eich hen gyndeidiau yn teithio, ac ail-grewyd hyn ichi ei fwynhau heddiw.

Dewisodd adeiladwyr gwreiddiol y rheilffordd sy’n cysylltu ffermwyr lleol gyda thref farchnad y Trallwng, led o 2 droedfedd 6 modfedd. Mae hyn yn caniatáu cromliniau tyn a graddiannau serth fel y gall y rheilffordd deithio ar draws tirlun tonnog y rhan brydferth hon o ganolbarth Cymru.

Efallai y gwelwch chi grëyr glas, hwyaden ddanheddog, cnocell y coed neu foncath. Mae’r trên yn rhedeg drwy ystâd Powis lle gellir gweld ffesantod a cheirw ac amrywiaeth eang o flodau gwyllt. Mae’r lein yn dilyn dyffryn afon, yn cordeddu o gwmpas melin ac yn llifo drwy ganol ffermydd.

Oedwch am fwyd a diod oer neu boeth, brechdanau, cawl neu ddetholiad o gacennau cartref a hufen iâ yn Ystafell De Llanfair Caereinion. Mae’r ystafell de ar agor i bawb pan fo’r trenau’n rhedeg, ac ar ddiwrnodau eraill dewisol yn ystod yr haf. Hefyd, mae’r siop anrhegion yn Sgwâr y Gigfran, y Trallwng yn gwerthu diodydd poeth ac oer.

Ceir siopau anrhegion llawn cynnyrch yng ngorsafoedd y Trallwng a Llanfair Caereinion, sy’n gwerthu anrhegion, llyfrau ar reilffyrdd a DVDs i bobl o bob oed.