Rheilffordd Yr Wyddfa

O’r golygfeydd cyntaf o’r cwymp dŵr yn plymio i’r ceunant islaw ar gychwyn y daith i olygfeydd godidog dros ochrau syth ‘Rocky Valley’, mae pob eiliad yn gofiadwy. Datguddir un o olygfeydd ‘panorama’ gorau’r byd wrth i’r trên gyrraedd y Copa. Gall yr hen a’r ifanc sawru awyrgylch fywiog Eryri - Gwlad yr Eryrod o uwchben y cymylau.

Mae rhagor na hanner miliwn o ymwelwyr ar gyfartaledd bob blwyddyn yn ymweld â chanolfan ymwelwyr Hafod Eryri ar gopa’r Wyddfa, ac nid yw’n anodd gweld pam. Ar ddiwrnod clir, mae’r golygfeydd yn ymestyn cyn belled ag Iwerddon. Mae caffi’r copa’n gwerthu amrywiaeth o ddiodydd a byrbrydau poeth ac oer, sy’n sicrhau mai gorsaf Hafod Eryri yw’r orsaf ail-lenwi uchaf yng Nghymru a Lloegr.

Y Profiad Stêm Treftadaeth ar y ‘Snowdon Lily’ a’r ‘Mountain Goat’.

A hwythau’n cael eu gwthio gan locomotifau stem o’r Swistir o 1896, mae’r cerbydau treftadaeth yn ail-luniad o gerbydau arsylwi'r Snowdon Mountain Tramroad & Hotels Company. Adeiladwyd y Snowdon Lily a’r Mountain Goat ar y siasïau a’r ‘bogiau’ gwreiddiol o gerbydau 1896. Teithiwch yn yr un modd ag y gwnaeth eich cyndeidiau wrth i chi esgyn uwchlaw’r cymylau i gopa’r Wyddfa.

Cynghorir ymwelwyr sy’n hoffi ychydig mwy o le i archebu eu taith ar y Profiad Stêm Treftadaeth gyda’i eil ganol, lle gall 34 o bobl eistedd. Mae’r daith yn ôl yn cymryd tua dwy awr a hanner, sy’n cynnwys aros am 30 munud ar y Copa.

Y Gwasanaeth Diesel Traddodiadol

Adeiladwyd cerbydau newydd yn 2013 ar gyfer ein gwasanaeth diesel traddodiadol er mwyn sicrhau y gall ymwelwyr barhau i fwyhau profiad Rheilffordd yr Wyddfa am lawer o flynyddoedd i ddod.

Mae’r cerbydau cyfoes diesel sy’n cael eu gwthio gan locomotifau diesel yr Hunslet Engine Company yn dal hyd at 60 o deithwyr.

Disgwylir i drenau deithio i orsaf Clogwyn, dri chwarter y ffordd i’r Copa yn ystod dechrau’r tymor (Mawrth ac Ebrill).